Nípa Ẹ̀sùn Ìfipábánilòpọ̀: Omidan Felicia Rawọ́ Ẹ̀bẹ Fún Ìdájọ́ Òdodo

By Yusuf Olaniyi On Mar 23, 2025

Omidan Felicia Ogbonna, tí ó jẹ́ ẹni ọdún mọ́kànlélógún ti rawọ́ ẹ̀bẹ̀ sí ìjọba léyìí tí ó bèrè fún ìdájọ́ òdodo látàrí fífi ipá bá a lòpọ̀, èyí tí ó wáyé láti ọwọ́ onísòwò ńlá tí ó fi ìlú Èkó se ibùgbé, Ọ̀gbẹ́ni Emeka Uyalemuo

Ọ̀gbẹ́ni Martin Agba tí ó jẹ́ agbẹjọ́rò rẹ̀ ni ó sọ ọ̀rọ̀ náà ní ìlú Abuja ní ọjọ́ Ẹtì, nígbà tí ẹni tí ọ̀rọ̀ kàn sọ pé afurasí náà ti bá òun lòpọ̀ ní àìmọye ìgbà léyìí tí ìyàwó rẹ̀ náà jẹ́ olùjẹ́rìí sí i

Nígbà tí ó ń fi ẹ̀dùn ọkàn rẹ̀ hàn láti ẹnu agbẹjọ́rò rẹ̀, Felicia sọ pé ìsẹ̀lẹ̀ náà bẹ̀rẹ̀ ní ọdún 2021 nígbà tí òun wà ní ẹni ọdún mẹ́tàdínlógún, tí òun sì ń gbé pẹ̀lú ìdílé Uyalemuo, ní ìlú Èkó

Ó wá rawọ́ ẹ̀bẹ̀ sí ìjọba àpapọ̀ àti gómìnà ìpínlẹ̀ Eko, Babajide Sanwo-Olu láti rí i dájú pé ìdájọ́ òdodo wáyé lórí ìsẹ̀lẹ̀ láabi náà